Ólafur Jóhannesson, þjálfari Vals, gat sætt sig við stig í kvöld er liðið mætti Stjörnunni í efstu deild karla.
Valsmenn gátu þó klárað leikinn undir lokin en Patrick Pedersen klikkaði þá á vítapunktinum.
,,Kaflaskiptur leikur en ég er ánægður með stigið,“ sagði Ólafur við Stöð 2 Sport eftir leikinn.
,,Mér fannst við byrja fínt og skorum gott mark en saga okkar er að þegar við skorum mark þá er eins og við hræðumst eitthvað og þurfum að lenda undir til að fá knöttinn.“
,,Nú er bara næsti leikur, Vestmannaeyjar og við förum að undirbúa okkur fyrir það.“
Ólafur var svo spurður út í markið sem Stjarnan skoraði og komst í 3-1 en það var dæmt af.
Markið fékk að standa í ágætis tíma en Helgi Mikael dómari ákvað svo að dæma rangstöðu og var markið tekið af.
,,Ég sé ekki hvort hann sé rangstæður, þið vitið það. Þú veist það núna og ert að spyrja mig að því.“
,,Það sem mér skildist þá spurði hann leikmanninn hvort hann hefði komið við boltann og hann hefur örugglega sagt já og þess vegna dæmdi hann rangstöðu. Hann átti að segja nei.“