Bjarni Helgason, blaðamaður á Morgunblaðinu sendir stjórnvöldum á Íslandi, væna pillu í blaði dagsins. Þar segir hann að þungt regluverk hamli íslenskum íþróttafélögum.
,,Ég skellti mér á Víkingsvöll 29. júlí síðastliðinn þar sem Víkingar fengu Breiðablik í heimsókn í 14. umferð deildarinnar. Víkingar voru í fallsæti fyrir leikinn, liðið hafði ekki unnið leik síðan 23. júní, á meðan Breiðablik vann síðast deildarleik 22. júní síðastliðinn gegn lélegasta liði deildarinnar. Samt var stúkan troðfull af stuðningsmönnum beggja liða sem voru duglegir að öskra á dómarann (áhugamál sem virðist vera mjög einkennandi fyrir íslenska stuðningsmenn),“ skrifar Bjarni í blað dagsins.
Bjarni segist hafa orðið var við bjór í stúkunni í Víkinni, flest félög eru byrjuð að selja bjór, þrátt fyrir að það sé í raun bannað.
,,Leikurinn var hin besta skemmtun og alls voru fimm mörk skoruð, þar af þrjú á þriggja mínútna kafla í síðari hálfleik. Það var 18° stiga hiti í Fossvoginum á mánudaginn, logn og glampandi sól. Það var líka verið að grilla hamborgara í Víkinni og einhverjum til mikillar mæðu var hægt að kaupa sér mjöð á staðnum líka. Það voru fáir sem stóðust þá freistingu að fá sér einn kaldan í stúkunni á meðan þeir fylgdust með leiknum. Hvað með börnin? hugsaði ég.“
Bjarni segist ekki hafa orðið var við það að unga fólkið hafi fengið kvíðakast, við að sjá fólk fá sér einn bjór.
,,Mér til mikillar undrunar virtist þetta hafa lítil sem engin áhrif á ungviðið sem var einnig mætt á völlinn til þess að styðja sitt lið. Umgjörðin í kringum liðin á Íslandi er alltaf að batna. Áfengissala í góðu hófu er frábær fjáröflun fyrir félögin og það er mér gjörsamlega óskiljanlegt af hverju þetta er ekki bara fullkomlega löglegt.“
Bjarni segir regluverkið á Íslandi hamla því að íþróttafélög safni sér fjármunum.
,,Það eru of mörg regluverk hér á landi sem hafa hamlað framgangi íslenskra íþróttafélaga á undanförnum árum, bæði hvað varðar fjáröflunar- og auglýsingatekjur. Vonandi fara stjórnvöld að vakna af þessum allt of langa blundi og huga að því sem skiptir raunverulega máli.“