Það hefur sjaldan verið fjallað jafn mikið um eitt mál og þegar Hannes Þór Halldórsson, markvörður Vals fór í brúðkaup Gylfa Þórs Sigurðssonar í sumar. Hannes var meiddur og fékk frí frá æfingum Vals í tvo daga, til að fara til Ítalíu. Mikið var fjallað um málið.

Nú er annað slíkt mál komið upp en Hörður Árnason, mikilvægur leikmaður HK ætlar ekki að taka þátt í leik liðsins um helgina gegn Grindavík.

Hörður er að fara erlendis í brúðkaup en fjallað var um málið í Dr. Football, hinum afar vinsæla hlaðvarpsþætti. Hannes var hins vegar óleikfær á meðan Hörður er með fulla heilsu og gæti spilað leikinn.

,,HK-ingar ætla að taka þetta með annari hendi, leikmaður liðsins ætlar að skella sér erlendis í brúðkaup á meðan aðrir fara suður með sjó og berjast fyrir þremur mikilvægum punktum í Evrópubaráttu,“ sagði Kristján Óli Sigurðsson, sérfræðingur þáttarins.

Kristján segir að hann væri brjálaður ef hann væri stuðningsmaður HK. Liðið situr í fjórða sæti deildarinnar og á góðan möguleika á Evrópusæti.

,,Ef ég væri stuðningsmaður HK eða styrktaraðili, vitandi að lykilmaður væri á leiðinni erlendis þegar Evrópa er handan við hornið, þá væri ég ósáttur.“

Hjörvar Hafliðason, segir að þetta hafi verið vitað í fleiri vikur, að Hörður myndi sleppa þessum leik.

,,Ég þekki þetta mál, bróðir hans er að gifta sig. HK er fjölskylduklúbbur af gamla skólanum, það var sagt frá byrjun að hann myndi vera viðstaddur. Fjölskyldan er allt, það eru þau gildi.“

Pepsi Max deildin á 433 er í boði