Frank De Boer, hefur beðist afsökunar á því að hafa sagt að konur ættu ekki að fá sömu laun og karla í fótbolta. Það væri heimskulegt
Frank de Boer er goðsögn í hollenskum fótbolta, hann náði langt á ferli sínum og hefur sterkar skoðanir á hlutunum. Hann sagði í viðtali í gær að það væri fáránlegt að hollenska knattspyrnusambandið ætli frá og með 2023 að borga konum það sama og körlum.
Laun kvenna í knattspyrnu hafa hækkað nokkuð hratt en þær eru þó langt á eftir körlunum. De Boer sagði það mjög eðlilegt, vinsældir kvennaknattspyrnu séu fjarri þeim vinsældum sem karlafótbolti hefur. ,,Í mínum huga er það bara heimskulegt, það er verið að gera þetta í tennis líka,“ sagði De Boer sem starfar í dag hjá Atlanta í Bandaríkjunum.
,,Sem dæmi ef það eru 500 milljónir sem horfa á úrslitaleik karla á HM, þá eru kannski 100 milljónir sem horfa á úrslitaleik HM kvenna. Það er munurinn, þetta er ekki eins. Þær eiga að fá borgað það sem þær eiga skilið, ekki minna. Bara það sem þær eiga skilið.“
Orð De Boer fóru illa í marga og vildi hann draga í land. ,,Ég vil sérstaklega taka orðið heimsmkulegt til baka, það er sterkt orð. Ef þú lest allan textann, þá vil ég styðja við knattspyrnu kvenna,“ sagði De Boer.