Leifur Andri Leifsson, fyrirliði HK sér ekkert með öðru auganu í dag. Leifur fékk þungt högg í mögnuðum sigri HK á KR í gær, í Pepsi Max-deild karla.

HK vann þá 4-1 sigur en seint í leiknum varð Leifur að fara af velli. ,,Ég er ekki viss hvað gerist, Arnar markvörður kemur út í boltann og það eru einhverjir þarna í kringum okkur. Ég veit ekki hvort ég hafi fengið olnboga eða skallað í hnakkann á einhverjum. Ég sé það vonandi í Pepsi Max-mörkunum í kvöld,“ sagði Leifur þegar 433.is ræddi við hann í dag.

Leifur var staddur á sjúkrahúsi þegar blaðamaður ræddi við hann. Leifur sér ekkert með vinstra auganu í dag, verið er að athuga hvort eitthvað sé brotið þar í kring.

,,Ég er á slysó núna, ég get bara ekki opnað augað. Þetta er eins og eftir góðan boxbardaga, ég sé bara með hægra auganu.“

Leifur hefur spilað frábærlega síðustu vikur eins og allir í HK, liðið er á miklu flugi. Flestir spáðu því að nýliðarnir myndu falla úr deildinni. Nú er ljóst að það gerist ekki og á liðið góðan möguleika á Evrópusæti.

,,Þetta var mjög góður sigur í gær, þetta var í takt við það sem við höfum verið að gera. Við förum óhræddir í alla leiki, það var reyndar draumi líkast að vera 3-0 yfir gegn KR, eftir tuttugu mínútur. Við vissum að þeir ættu leik í undanúrslitum bikarsins í vikunni, þeir voru kannski komnir með hugann lengra en að þessum leik.“

Gengi HK var brösugt til að byrja með, hvað hefur breyst? ,,Við gerðum okkur bara fljótt grein fyrir okkar styrkleikum, við erum ekki að fara út úr þeim. Við þroskuðumst hratt, við erum hættir að gera lítil mistök sem eru dýrkeypt. Um leið og 1-2 sigrar komu í hús, þá fór sjálfstraustið á flug. Það hjálpar mikið.“