,,Það er mikið búið að ganga á, búið að vera mjög þungt á Hlíðarenda,“ sagði Hannes Þór Halldórsson, markvörður Vals og íslenska landsliðsins.

Hannes mætti heim í Pepsi Max-deildina í apríl, stærsta nafnið sem komið hefur heim í deildina lengi. Valur situr á botni Pepsi Max-deildarinnar, liðið sem allir spáðu titlinum.

Hannes hefur staðið sig með ágætum í slöku liði Vals, hann hefur gaman af því að spila hér heima þó illa gangi.

,,Þetta er nákvæmlega eins og ég mundi eftir þessu, það er mjög mikilvægt fyrir mig að vera að spila. Það hefði ekki gengið til lengdar að horfa á leiki og mæta svo að spila landsleiki, ég hef fundið fínan takt. Þó að ég sé hluti af liði Vals sem gengur illa, þá hef ég verið sáttur með það.“

Eftir að Hannes kom heim þá hefur átt sér stað umræða, hvort hann haldi sæti sínu í liðinu. Ögmundur Kristinsson og Rúnar Alex Rúnarsson, spila í sterkari deildum. Landsliðið mætir Albaníu á laugardag í undankeppni EM, eftir viku er svo leikur við Tyrki.

,,Ég átti alveg von á þessu, verandi á Íslandi og þeir að standa sig frábærlega. Þetta var viðbúið, þetta truflar mig ekki neitt. Ég undirbý mig að spila á laugardaginn, það er ekki flóknari en það.“

Viðtalið við Hannes er í heild hér að neðan.