Ólafur Jóhannesson, þjálfari Vals, var fúll í kvöld eftir tap sinna manna gegn KR í Pepsi Max-deild karla.
Valur komst í 2-0 á Meistaravöllum í kvöld en sú forysta entist ekki lengi. KR svaraði með þremur mörkum og vann 3-2 sigur.
,,Mér fannst við vera ragir, við þorðum ekki að spila boltanum og halda honum aðeins,“ sagði Óli Jó.
,,Auðvitað setur það skjálfta í öll lið þegar þau fá á sig mark en viðbrögðin voru ekki nógu góð.“
,,Við máttum halda boltanum betur, mér fannst það aðal ástæðan. Við vorum búnir að tala um það að þora að fara á þá og halda boltanum, ekki detta of langt til baka. Því miður fórum við of langt til baka.“
,,KR-ingarnir voru meira með boltann en við, uppleggið var þannig að vera ekki að stressa sig á því en það er ekki nóg.“
,,Við erum bara í botnbaráttu og verðum að virða það og haga okkur samkvæmt því.“