Mikael Nikulásson, sparkspekingur, lét markvörðinn Harald Björnsson heyra það í hlaðvarpsþættinum Dr. Football í gær.
Mikael sá leik FH og Stjörnunnar í Pepsi Max-deild karla um helgina en Haraldur lék þar í marki Stjörnunnar.
Leiknum lauk með 2-2 jafntefli en Mikael var langt frá því að vera hrifinn af frammistöðu markmannsins.
Hjörvar Hafliðason, umsjónarmaður þáttarins, spurði þá Kristján Óla Sigurðsson og Mikael hvort Stjarnan þyrfti á nýjum markverði að halda og þá fór allt á fullt.
,,Ertu að grínast eða? Þetta er þannig, þið voruð að tala um þetta um daginn. Stjáni er kannski búinn að sjá aðeins meira en ég með Stjörnunni og sýndi mér einhverjar myndir og eitthvað. Það hafa alveg komið myndir af mér þar sem ég er búttaður en ég er helköttaður eins og þið sjáið,“ sagði Mikael.
,,Myndir segja ekki allt. Þarna fór ég bara live til að skoða þetta. Gæinn er 30 kílóum of þungur. Hann er í tómu rugli. Ef FH hefði getað eitthvað í þessum leik þá hefðu þeir skorað 7 eða 8 mörk. Þeir fengu 3-4 mjög góð færi en það var ekki hann sem var að verja þau.“
,,Hvað er að gerast þarna? Gæinn er skelfilegur í markinu. Þetta er flottur markmaður í formi en hann er svona 30 kílóum of feitur. Stjáni er í betra standi en hann. Ég skal lofa ykkur því að þegar klukkan slær 12:01 þann 1. júlí þá fer Rúnar í símann til að ná sér í markmann.“