Birkir Már Sævarsson gat brosað í kvöld eftir öruggan sigur Vals í Pepsi Max-deild karla.
Birkir átti fínasta leik í bakverði er Valur fagnaði öruggum 5-1 sigri á Eyjamönnum.
,,Ég held að við höfum allir haft gott af smá pásu frá deildinni og það er frábært að byrja seinni hlutann svona,“ sagði Birkir.
,,Gamla Valsspilið og gamla Valsliðið kom til baka, við héldum boltanum vel, sköpuðum fullt af hálf sénsum og keyrðum svo yfir þá í seinni.“
,,Við vorum búnir að vera það góðir og svo kemur eitthvað draumaskot í skeytinn sem er lítið hægt að gera við þannig séð svo við héldum bara áfram.“
Birkir var utan hóps á dögunum er íslenska landsliðið spilaði við Albaníu og Tyrki í undankeppni EM.
,,Það var hundleiðinlegt að fá ekki að vera með en þeir stóðu sig vel strákarnir. Ef maður er ekki valinn í hópinn þá styður maður þá sem eru með og gerir sitt besta í því.“
,,Það kom alveg svolítið á óvart og ég var fúll yfir því en ég þarf bara að sýna það á vellinum að ég eigi heima í þessum hóp.“