Íslenska karlalandsliðið vann gríðarlega mikilvægan sigur í gær er við spiluðum við Tyrki í undankeppni EM. Ísland þurfti í raun á sigri að halda í leik gærkvöldsins til að minnka bilið í baráttunni um efstu tvö sæti riðilsins. Ísland mætti sterkt til leiks á Laugardalsvelli og var staðan fljótt orðin 2-0 fyrir strákunum.
Ragnar Sigurðsson gerði bæði mörk Íslands eftir fast leikatriði með stuttu millibili og staðan 2-0 í fyrri hálfleik. Undir lok hálfleiksins minnkuðu Tyrkir svo muninn með skalla eftir hornspyrnu og staðan í leikhléi 2-1.
Það var rólegra yfir leiknum í seinni hálfleik þar sem engin mörk voru skoruð og lokatölur 2-1 fyrir okkar mönnum. Ísland er nú með jafn mörg stig og Frakkar og Tyrkir en með verri markatölu í þriðja sæti riðilsins.
Gylfi Þór Sigurðsson var enn á ný frábær fyrir íslenska landsliðið, hann var til umræðu í hlaðvarpsþætti Fótbolta.net eftir leik í gær.
,,Maður tók eftir því í dag, hann er á stórstjörnuafslættinum. Hann er líka klókur, hann er heiðarlegur leikmaður. Hann velur augnablikin vel,“ sagði Tómas Þór Þórðarson, um það hvernig dómari leiksins Szymon Marciniak, fór með Gylfa í leiknum.
Gylfi er skærasta stjarna liðsins og því telur Tómas að dómarar gefi honum meiri afslátt en öðrum leikmönnum þegar kemur að brotum og slíkum hlutum.
,,Eins og undir lokin, þetta hefur ekkert verið gott þegar hann fær hann upp á bakið. Gylfi er stór og sterkur strákur, hann meiðar sig ekki svona auðveldlega.“
,,Hann fær klárlega aukaspyrnur sem ekki aðrir fá, hann er ekki að ofnota þetta.“