Tottenham 0-2 Liverpool
0-1 Mo Salah(víti, 2′)
0-2 Divock Origi(87′)
Liverpool fagnaði sigri í Meistaradeild Evrópu í kvöld er liðið mætti Tottenham í úrslitaleiknum í Madríd.
Leikið var á Wanda Metropolitano vellinum, heimavelli Atletico Madrid og vann Liverpool 2-0 sigur.
Ballið byrjaði á fyrstu mínútu er Mo Salah skoraði fyrra mark leiksins úr vítaspyrnu. Hendi var dæmd á Moussa Sissoko strax í byrjun leiks og skoraði Salah örugglega.
Tottenham var í kjölfarið meira með boltann nánast allan leikinn og fékk ákjósanleg færi til að jafna metin.
Næsta mark skoraði hins vegar Divock Origi fyrir Liverpool á 87. mínútu og gulltryggði titilinn.
Liverpool tókst því að hefna fyrir tapið á síðustu leiktíð er liðið lá gegn Real Madrid í úrslitunum.