Skúli Jón Friðgeirsson er gestur í nýjum hlaðvarpsþætti sem heitir Draumaliðið, þættinum stýrir Jóhann Skúli Jónsson. Þar ætlar hann sér að fá gesti til að velja draumaliðið af ferli sínum.

Skúli er harður KR-ingur og hefur alla tíð á Íslandi, spilað fyrir KR. Hann valdi draumalið sitt af ferlinum og í liðinu var Bjarni Guðjónsson, sem er í dag aðstoðarþjálfari KR.

,,Hann er gaur sem krefst alltaf 100 prósent frá mönnum í kringum sig,“ sagði Skúli um Bjarna.

Skúli rifjaði það upp þegar hann hitti Bjarna fyrst, þá var Bjarni atvinnumaður í fótbolta, en fékk að æfa með KR um smumarið.

,,Hann kom nokkrum sinnum þegar hann var atvinnumaður. Það gengur og gerist að menn koma og fá að æfa, þeir sem eru að koma úr atvinnumennsku eru að sprikla í fríinu, eru að passa sig að meiðast ekki og svona. Eru kurteistir og fínir, Bjarni Guðjónsson mætti. Ég hafði aldrei hitt manninn, hann mætti á æfingu og byrjaði að drulla yfir allt og alla. Ef hann fékk ekki boltann, þá öskraði hann á menn. Hann var með stæla og ég man að ég hugsaði með mér ´Hvað heldur hann að hann sé?´.“

Tveimur árum síðar var Bjarni orðinn leikmaður KR, hann hafði þá róast. Hann lýsir honum sem mögnuðum leikmanni.

,,Svo liðu tvö ár og þá var hann að mæta í KR, þá hugsaði ég ´Er ég að nenna þessu?´. Þá var aðeins loftið farið úr blöðrunni, hann krafðist alltaf 100 prósent af þér en fór betur að þér. Frábær fótboltamaður og skemmtilegur karakter.“