Júlíus Ármann Júlíusson, knattspyrnuþjálfari hjá meistaraflokki kvenna í Aftureldingu, bjargaði lífi ungs drengs um helgina. Atvikið átti sér stað á Hamborgarafabrikkunni á Akureyri. Morgunblaðið segir frá.
„Ég veit ekki hvað það var, ég einhvern veginn bara stökk inn í þetta, tók drenginn og náði að gera það sem þurfti að gera,“ segir Júlíus við Morgunblaðið.
Auk þess að stýra meistaraflokki kvenna er Júlíus einnig með þriðja flokk karla hjá Aftureldingu, hann var staddur á Akureyri með liðið í keppnisferð. Vegna fjölmennis á staðnum, sat Júlíus á endanum á borðinu. „Í næsta bás voru tvær ungar konur, móðir og vinkona hennar líklega með lítinn strák, tveggja eða þriggja ára gamlan. Mér varð einu sinni litið til hans á meðan við vorum að panta matinn.“
Júlíus tók eftir því að ekki var allt með feldu þegar stóð í drengnum. „Ég tek drenginn úr höndunum á henni og næ að fara með hægri höndina undir bringuna, einhvern veginn beygi mig niður með hann og slæ létt á milli herðablaðanna. Í fimmta eða sjötta skiptið þá byrjar hann að gráta og þá er eins og það hafi hrokkið upp úr honum.“
„Hún var alveg í sjokki, skalf og nötraði og það voru allir einhvern veginn í sjokki. Hún var að sjálfsögðu gríðarlega þakklát og kom ekki upp orði.“
Júlíus hefur verið knattspyrnuþjálfari í 32 ár, þar fer hann á skyndihjálparnámskeið árlega. „Allur staðurinn klappaði fyrir þessu en það er ekki það sem ég sé í þessu, það var bara gott að ég var á þessum stað á þessari stund. Ég er gríðarlega þakklátur fyrir það að hafa fengið að bjarga lífi þessa unga drengs og verð það alla tíð.“