Vicente del Bosque, fyrrum stjóri Real Madrid, sagði í gær ansi athyglisverða sögu af framherjanum Nicolas Anelka.
Anelka gekk í raðir Real frá Arsenal árið 1999 en náði aldrei að festa sig í sessi á Santiago Bernabeu.
Del Bosque segir að Anelka hafi verið athyglisverður náungi en í eitt skiptið neitaði hann að mæta á æfingar félagsins því samherjar hans fögnuðu ekki mörkunum með honum.
,,Anelka var leikmaður sem kostaði félagið mikla peninga. Real sóaði fimm milljónum evra í hann og hann átti að vera stjarna,“ sagði Del Bosque.
,,Hann kom einn daginn inn í búningsklefann og sagði að við værum ekki ánægðir fyrir hans hönd, að við værum ekki að fagna mörkunum hans.“
,,Í kjölfarið þá ákvað hann að sleppa því að mæta á æfingar í tvo daga og félagið sektaði hann.“