Ögmundur Kristinsson hefur verið í atvinnumennsku síðustu fimm ár og hefur átt farsælan feril. Ögmundur fagnar þrítugsafmæli sínu í sumar, hann er á besta aldri þegar kemur að markvörslu. Hann ólst upp í Safamýri og er Framari, hefur að mestu vermt bekkinn hjá íslenska landsliðinu en vonast eftir tækifæri og trausti innan tíðar. Ögmundur var gestur í hlaðvarpsþætti okkar, 90 mínútum, sem má nálgast í heild hér að neðan. Einnig má hlusta á hann á hlaðvarpsveitum og Spotify.
Ögmundur var að klára sitt fyrsta tímabil í Grikklandi en hann leikur með AEL Larissa. Markvörðurinn átti frábært tímabil og stærri félög hafa áhuga á að kaupa hann í sumar. „Þetta er mjög sterk deild með mjög sterkum liðum. Það gleymist aðeins þegar maður hugsar um grísku deildina. Þessi stóru lið eru virkilega góð og virkilega sögufræg í Evrópukeppnum. Það var eiginlega aldrei spurning hvort maður færi þangað,“ segir Ögmundur um dvölina í Grikklandi.
Fór langt niður eftir sms frá KSÍ
Það vakti talsverða athygli síðasta sumar þegar Ögmundur var ekki í hópi Íslands sem fór á HM, flestir töldu öruggt að hann yrði á meðal þeirra 23 leikmanna sem Heimir Hallgrímsson valdi. Það var högg fyrir Ögmund að fá skilaboð um annað. „Ég ætla ekkert að ljúga hvað það varðar, það var mjög erfiður dagur. Ég fór langt niður og þetta kom mér á óvart,“ segir Ögmundur.
„Ég var búinn að vera fastamaður í fimm eða sex ár og hafði spilað í undankeppninni fyrir HM sem kom liðinu á HM. Leikurinn á móti Finnum heima, sem var mjög dramatískur og mikilvægur þegar upp var staðið, hafði unnist. Þetta var gríðarlega svekkjandi og það kom mér á óvart. Ég fékk tíðindin í smáskilaboðum. Þetta var alvöru skellur. Ég trúði þessu ekki, ég vissi ekki hvað ég átti að gera. Ég fór bara langt niður, en það er búið og gert,“ segir Ögmundur sem er mættur aftur í íslenska landsliðið og gæti fengið tækifæri sem fyrsti markvörður, von bráðar.
Stoltur af tengdapabba sínum:
Það vakti mikla athygli fyrir ári síðan þegar Steinar Skarphéðinn Jónsson, tengdapabbi Ögmundar mætti á fréttamannafund Heimis Hallgrímssonar. Hann vissi af því að Ögmundur væri ekki í landsliðshópnum sem færi á HM og var ósáttur. Hann spurði Heimi út í valið á fundinum, mikið var fjallað um atvikið.
„,Nei, ég vissi ekki að hann ætlaði að láta sjá sig. Það eina sem ég tek úr því er alvöru stuðningur og ég á yndislegan tengdaföður sem elskar mig mikið,“ sagði Ögmundur um atvikið.
„Hann gerir allt fyrir mig og ég held að flestir drengir væru til í að eiga tengdapabba sem gerir það. Ég var ekkert pirraður út í hann, bara stoltur af honum ef eitthvað er,“ sagði Ögmundur um málið en viðtalið við þennan frábæra markvörð má heyra hér að neðan.