Peter Coates, eigandi Stoke segir að félagið hafi verið í klessu þegar hann keypti það árið 2006. Coates hafði selt Stoke árið 1997 og keypti félagið aftur árið 2006, af Íslendingum.

Stoke Holding var í eigu Íslendinga en þeir Gunnar Gíslason, Magnús Kristinsson, Halldór Birgisson og Stefán Þórisson áttu félagið.

Félagið ætlaði að reyna að koma sér upp í úrvalsdeildina en Íslendingarnir voru nánast að gera félagið gjaldþrota, þegar Coates keypti það aftur. Stoke var þá í Championship deildinni.

Coates er einn ríkasti maður Bretlands í dag en hann stofnaði veðmálafyrirtækið, Bet365 á meðan hann tók sér frí frá Stoke. ,,Það er mjög erfitt að útskýra fjárhagstöðu félagsins árið 2006 með öðru orði en vonleysi,“ sagði Coates en í dag eru 13 ár frá því að hann tók félagið aftur.

,,Fyrrum eigendur, Stoke Holding tóku þá ákvörðun árið 2005 að setja meiri pening í þjálfun og laun leikmanna, þeir hækkuðu það mikið. Það átti að reyna að komast upp, sú ákvörðun borgaði sig ekki.“

,,Það var ekki bara það, það voru slæm úrslit og frammistöður á Britannia Stadium. Þar vann liðið bara sjö leiki af 26, þá fóru að koma færri á völlinn og erfiðara var að fá auglýsingasamninga.“

,,Skuldir félagsins voru 9 milljónir punda og félagið var nánast gjaldþrota. Það var þungt yfir félaginu og það þurfti að taka stórar ákvarðanir.“