Raheem Sterling, stjarna Manchester City, ætlar að reyna að fá fund með enska knattspyrnusambandinu í sumar.

Margir leikmenn urðu fyrir kynþáttaníði á Englandi í vetur og var sambandið í vandræðum með að hafa stjórn á hlutunum.

Þær refsingar sem sambandið stakk upp á þóttu vera vægar og er barist fyrir þvi að liðum og stuðningsmönnum verði refsað enn frekar.

Sterling er einn af þeim sem varð fyrir áreiti í vetur og mun hann reyna að skipuleggja fund með sambandinu í sumarfríinu.

,,Sem knattspyrnumaður þá ertu upptekinn á æfingum á hverjum degi og svo spilarðu á tveggja eða þriggja daga fresti, við höfum ekki mikinn tíma til að ræða við annað fólk,“ sagði Sterling.

,,En nú þegar ég er í fríi þá get ég gefið því tíma að ræða við sambandið og sjá hvernig við getum farið að þessu. Ég verð svo sannarlega einn af þeim til að reyna það.“

,,Þetta var mun verra fyrir tíu árum síðan. Þetta er að batna og fólk skilur það að það megi ekki segja suma hluti.“

,,Það er hluti af enskri menningu að fara snemma út á laugardögum og fá sér drykk. Mikið af þessu fólki er undir áhrifum áfengis um leið og þau mæta á völlinn. Þetta er þó að batna og er betra en það var áður.“