Það er mikið talað um hinn unga Daniel James þessa dagana en hann spilar með Swansea City.
James er einn efnilegasti leikmaður Wales og er oft líkt við Gareth Bale, stórstjörnu landsliðsins.
James er talinn vera að ganga í raðir Manchester United og mun hann kosta 20 milljónir punda.
Þessi efnilegi leikmaður fékk þó hræðilegar fréttir í dag er honum var tjáð að faðir hans væri látinn.
Faðir James var 60 ára gamall en hann lést skyndilega og ríkir að vonum mikil sorg í fjölskyldunni þessa stundina.
Talið var að James myndi ganga í raðir United í þessari viku en útlit er fyrir að svo verði ekki.
United hefur tjáð James að taka sinn tíma í að vera með fjölskyldunni og mun ekki pressa á hann að skrifa undir samninginn.
Faðir James hafði verið að glíma við veikindi en dauði hans kom þó verulega á óvart og var ekki búist við að hann myndi kveðja svo snemma.