Breiðablik fékk ÍA í heimsókn í Pepsi Max-deild karla í gær. Um var að ræða tvö efstu lið deildarinnar en þau voru bæði með tíu stig eftir fjórar umferðir.
Leikur gærkvöldsins var ágæt skemmtun en aðeins eitt mark var skorað og það gerðu gestirnir. Einar Logi Einarsson gerði það mark fyrir ÍA í uppbótartíma eftir hornspyrnu.
Skagamenn eru því nú með þriggja stiga forskot á toppnum eftir fimm umferðir. Bjarni Helgason, skrifaði um leikinn í Morgunblaðinu. Hann sendir pillu á Ágúst Gylfason, þjálfara Breiðabliks.
,,Blikar voru meira með boltann í gær en það er eini tölfræðiþátturinn sem þeir geta tekið með sér út úr leiknum. Þeir voru einfaldlega undir á öllum sviðum leiksins og sóknarleikur liðsins var lítill sem enginn,“ skrifar Bjarni í Morgunblaðið í dag
,,Liðið skapaði sér ekki opið marktækifæri allan leikinn og það vantaði einfaldlega kjark og þor í þjálfarateymi liðsins til að taka áhættu og sækja til sigurs á eigin heimavelli í gær. Það var eins og Blikar væru sáttir með stigið eftir 80. mínútna leik og þeir fengu það heldur betur í andlitið.“
Skagamenn eru nýliðar í Pepsi Max-deildinni, þeir hafa heillað marga.
,,Akurnesingar eru til alls líklegir í deildinni í ár eftir afar öfluga sigra gegn Val, FH og nú síðast Breiðabliki. Þeir eru vel þjálfaðir og Jóhannes Karl Guðjónsson virðist einfaldlega vera klókari en aðrir þjálfarar í úrvalsdeildinni eins og staðan er í dag. Enn og aftur eru Blikar að klikka á stóra prófinu og ef liðið ætlar sér ekki að sækja til sigurs í öllum leikjum geta þeir gleymt því að hampa Íslandsmeistaratitlinum í vor.“