Antoine Griezmann, leikmaður Atletico Madrid, hefur staðfest það að hann verði ekki hjá félaginu á næstu leiktíð.
Þetta kom fram í tilkynningu Atletico í kvöld en félagið greinir þar frá því að Griezmann sé á förum.
Frakkinn var hársbreidd frá því að yfirgefa Atletico síðasta sumar og ganga í raðir Barcelona.
Hann tók svo U-beygju og ákvað að framlengja samning sinn en yfirgefur félagið svo ári seinna.
Griezmann hefur lengi verið einn mikilvægasti leikmaður Atletico og verður það mikil blóðtaka fyrir félagið að missa hann.
Allar líkur eru á því að hann semji við Barcelona í sumar en önnur lið munu væntanlega reyna við leikmanninn.