Hlaðvarpsþátturinn, 90 mínútur heldur áfram á fullu fjöri en um er að ræða þátt sem Hörður Snævar Jónsson, ritstjóri 433.is stýrir.
Þátturinn hefur notið mikilla vinsælda en afar áhugaverðir gestir hafa komið í þáttinn.
Gestur þáttarins að þessu sinni er Pálmi Rafn Pálmason, hann hefur átt áhugaverðan feril, strákurinn frá Húsavík upplifði draumalífið í sjö ár. Hann hefur spilað fyrir KA, Val og KR.
Hann hefur tvisvar upplifað það að félag hans í atvinnumennsku var á barmi gjaldþrots, hann er einn besti leikmaður í efstu deild á Íslandi frá aldamótum.
Pálmi spilaði undir stjórn Willums Þórs Þórssonar hjá Val á sínum tíma en hann lék með liðinu frá 2006 til 2008.
Þar stóð Pálmi sig virkilega vel og var svo farinn í atvinnumennsku til Stabæk stuttu seinna.
Pálmi segir að það hafi verið mikil lífsreynsla að vinna með Willum sem þykir vera ansi litríkur karakter.
,,Það var mjög gaman að spila fyrir hann. Það var mikil upplifun. Ég var einstaklega heppinn með Todda fyrst og síðan Willum,“ sagði Pálmi.
,,Það var lífsreynsla að vera undir stjórn Willums. Á æfingum var hann ósjaldan með sem var óþolandi fyrir okkur hina því æfingin var ekki búin fyrr en hans lið var komið yfir.“
,,Ég fékk góðan hárblásara í 15 mínútur í einum hálfleik á Laugardalsvelli. Hann hjálpaði mér býsna vel og við unnum leikinn í seinni hálfleik.“
,,Það var spark í rassinn. Ég var vel pirraður út í hann og kom reiður út í seinni hálfleikinn sem hjálpaði.“
,,Hann kunni að kveikja í mér og hann gerði það þarna, ég gef honum það.“