Geoffrey Castillion hefur fengið greidd öll sín laun frá Víkingi Reykjavík. Þetta staðfesti hann við KSÍ í dag.
Castillion er samningsbundinn FH en félagið reynir nú að losna við hann, Castillion var á láni hjá Víkingi seinni hluta síðustu leiktíð.
Hann sagði við Fótbolta.net um helgina að ekki væri möguleiki á því að hann færi þangað aftur, þeir skulduðu sér laun frá síðustu leiktíð. Haukur Hinriksson lögfræðingur KSÍ, tjáði 433.is í dag að hann hefði fengið það staðfest frá Castillion, að Víkingur hefði gert upp við sig.
„Nei, það er ekki möguleiki lengur. Þeir skulda mér pening, þeir eiga eftir að greiða mér laun fyrir tvo mánuði. Ég hef reynt að ræða við þá, en þeir hunsa mig bara;“ sagði Castillion um helgina.
Til að Víkingur fái keppnisleyfi í Pepsi Max deildinni þá þurfa allir starfsmenn og leikmenn að staðfesta að þeir hafi fengið greidd sín laun. Castillion staðfesti við KSÍ í dag að Víkingur hefði gert upp við sig.
Hollenski framherjinn leitar sér að nýju félagi þessa stundina og vonast eftir því að ná að rifta samningi sínum við FH.
