Arnór Sigurðsson átti stórleik fyrir lið CSKA Moskvu um helgina sem mætti Spartak Moskvu í Rússlandi. Um var að ræða mikilvægan leik í Evrópubaráttunni en CSKA var einu stigi á undan Spartak fyrir leikinn.
Arnór reyndist of stór biti fyrir heimamenn í Spartak en hann skoraði öll mörk leiksins í sigri CSKA. Arnór skoraði tvennu fyrir CSKA snemma í síðari hálfleik sem reyndist nóg til að tryggja 2-0 sigur.
CSKA lyftir sér upp í þriðja sæti deildarinnar með sigrinum og er fjórum stigum á eftir toppliði Zenit.
Arnór er 19 ára gamall en CSKA keypti hann frá Norrköping í Svíþjóð síðasta sumar. Eiríkur Jónsson, blaðamaðurnn reyndi fjallar um sögu Arnórs á vef sínum. Arnór ólst upp á Akranesi en samkvæmt Eiríki þá fékk ÍA 50 milljónir króna, þegar Arnór var keyptur til Rússlands.
Skagamenn gætu svo fengið aðrar 50 milljónir í sumar ef marka má frétt Eiríks. ,,Mörg félög á meginlandinu fylgjast náið með Arnóri sem ku verða verðlagður á 1 milljarð og það myndi þýða að Skagamenn fengu 50 milljónir til viðbótar. Heimildir herma að lið eins og Real Madrid og Valencia á Spáni og Napolí og Atalanta á Ítalíu muni berjast um Arnór,“ skrifar Eiríkur.