Sindri Sverrisson, blaðamaður Morgunblaðsins skrifar áhugaverðan bakvörð í blað dagsins. Þar fer hann yfir það hvernig karlar og konur sitja ekki við sama borð í knattspyrnuheiminum.
UEFA, sem er knattspyrnusamband Evrópu er ekki tilbúið að gera eins vel við konur, eins og sambandið gerir við karla.
,,Manni finnst oft eins og að UEFA, knattspyrnusamband Evrópu, vilji draga talsvert lappirnar þegar kemur að knattspyrnu kvenna. Af hverju er til dæmis ekki enn búið að koma í gegn Evrópukeppni fyrir U21-landslið eins og hjá körlunum? Karlarnir hafa haft slíka keppni síðan á 8. áratug síðustu aldar en enn í dag er þetta leiðindabil fyrir góðar knattspyrnukonur frá U19-landsliði og í A-landslið,“ skrifar Sindri í Morgunblaðið í dag.
Sindri telur þannig upp þá staðreynd að UEFA sé að gera meira fyrir karlalið en kvennalið.
,,Þegar kemur að Evrópukeppnum félagsliða þá er UEFA með Meistaradeild Evrópu og Evrópudeildina hjá körlunum, auk þess sem áætlað er að þriðja Evrópukeppnin fari af stað eftir tvö ár (enn er reyndar óljóst hvernig hún verður). Þessar keppnir mala gull fyrir UEFA og aðildarsambönd þess, eins og KSÍ, njóta góðs af því.“
,,Hjá konunum er ein keppni. Hún nýtur vissulega vaxandi vinsælda en malar ekki gull fyrir UEFA eins og karlakeppnirnar. UEFA mætti hins vegar stíga það skref að stækka keppnina eða búa til aðra til að fjölga Evrópuleikjum og sýna þannig meira frumkvæði til að efla knattspyrnu kvenna.“
Sindri benti svo á það að tekjur af leikjum kvenna sé alltaf að aukast. Hins vegar þegar keppt er í Meistaradeildinni, þá mega konurnar ekki nota sama lag og karlarnir.
,,Þessu tengt þá var pínu fyndið að sjá fréttir þess efnis að félagsliðum í Meistaradeild kvenna væri bannað að nota „meistaradeildarlagið“ fyrir leiki í keppninni, eins og er ómissandi þáttur í Meistaradeild karla. Af hverju í ósköpunum? „Þetta er svo mikið smáatriði. Þetta er bara upptaka. Ýtið á play,“ sagði sænska landsliðskonan Elin Rubensson, en nei, UEFA segir að lagið megi aðeins tengjast Meistaradeild karla. Á næstu leiktíð fær Meistaradeild kvenna loks sitt eigið lag, eftir að hafa verið stofnuð 2001.“