Karren Brady, varaformaður West Ham United á Englandi, skrifar í dag athyglisverðan pistil á heimasíðu the Sun.
Brady þekkir enska boltann mjög vel en hún hefur verið í stjórn West Ham undanfarin níu ár.
Kvennalið West Ham tryggði sér sæti í úrslitum enska bikarsins á dögunum eftir 4-3 sigur gegn Reading í undanúrslitunum.
Brady segist vera stolt af árangri liðsins en segir að verðlaunaféð fyrir sigurvegara keppninnar sé móðgandi.
West Ham er ekki talið sigurstranglegt í úrslitaleiknum en liðið spilar þar við mjög sterkt lið Manchester City.
,,Þið gætuð haldið það að það sé risastórt verðlaunafé fyrir sigurvegarana en það er rangt,“ skrifar Brady.
,,Ásamt því að fá bikar og medalíur þá gefur knattspyrnusambandið sigurvegaranum nóg til að versla sér nýjan kjól og fara í klippingu.“
Verðlaunaféð fyrir sigurvegara keppninnar er 25 þúsund pund sem þykir ekki vera nógu há upphæð.
Til samanburðar þá mun sigurvegari keppninnar í karlaflokki fá 3,6 milljónir punda en þar mætast Watford og einmitt Manchester City.