Kolbeinn Sigþórsson, skrifaði í fyrradag undir tæplega þriggja ára samning við AIK í Svíþjóð. Kolbeinn er þannig kominn með nýtt félag en AIK, varð sænskur meistari á síðustu leiktíð.
Framherjinn öflugi hefur gengið í gegnum erfiða tíma á ferli sínum en samningi hans við Nantes í Frakklandi, var rift í síðasta mánuði. Félagið taldi sig ekki hafa not fyrir Kolbein, sem fékk enginn tækifæri. Hann náði samkomulagi um starfslok og er spenntur fyrir nýju upphafi.
Guðmundur Hilmarsson, einn reyndasti og virtasti blaðamaður landsins fagnar því að Kolbeinn hafi fengið nýja vinnu. Guðmundur ritar um málið í Morgunblaði dagsins.
,,Það eru virkilega ánægjuleg tíðindi að knattspyrnumaðurinn Kolbeinn Sigþórsson sé búinn að finna nýja vinnuveitendur en framherjinn er orðinn liðsmaður sænska meistaraliðsins AIK,“ skrifar Guðmundur í Morgunblaðið í dag.
Smelltu hér til að lesa ítarlegt viðtal við Kolbein um félagaskiptin.
Síðustu þrjú ár hafa verið erfið fyrir Kolbein sem varð heimsfrægur á EM í Frakklandi árið 2016.
,,Það er vonandi að nýr og betri kafli taki við hjá Kolbeini sem hefur lítið sem ekkert spilað eftir Evrópumótið í Frakklandi sumarið 2016 vegna þrálátra meiðsla. Kolbeinn komst svo sannarlega í heimsfréttirnar þegar hann skoraði sigurmarkið gegn Englendingum í 16-liða úrslitunum í Nice en skömmu eftir Evrópumótið varð hann fyrir erfiðum meiðslum og síðustu árin hafa verið sorgarsaga fyrir hann.“
,,Það vita flestir hversu öflugur leikmaður Kolbeinn er og það er von mín að við fáum að sjá hann sem allra fyrst í búningi íslenska landsliðsins þá kominn í það form sem við viljum sjá hann í.“
Kolbeinn hefur raðað inn mörkum fyrir íslenska landsliðið og er í hópi bestu leikmanna í sögu íslenska landsliðsins.
,,Kolbeinn er með frábæra tölfræði með íslenska landsliðinu. Hann hefur skorað 23 mörk í 48 leikjum og er annar markahæsti leikmaður landsliðsins á eftir Eiði Smára Guðjohnsen, sem skoraði 26 mörk í 88 leikjum.“
,,Næstu leikir íslenska landsliðsins í undankeppni EM verða í júní en þá mætir það Albönum og Tyrkjum í afar mikilvægum leikjum sem geta ráðið miklu um hvort Ísland eigi möguleika á að komast á þriðja stórmótið í röð.“
,,Ég tel hæpið að Kolbeinn verði kominn í nægilega gott stand til að taka þátt í þeim leikjum en ef allt gengur að óskum hjá honum er það mögulegt. En að öðrum kosti gæti hann stimplað sig inn fyrir fimm síðustu leikina í riðlinum sem fram fara í september, október og nóvember.“