Knattspyrnudeild Fylkis og FH hafa komist að samkomulagi um að Geoffrey Castillion verði lánaður til Fylkis út leiktíðina 2019.
Castillion er sóknarmaður, 28 ára Hollendingur. Hann hefur spilað 34 leiki og skorað 18 mörk í efstu deild á Íslandi fyrir FH og Víking.
FH gekk frá samningum við framherjann síðasta vetur en hann fann sig aldrei í Kaplakrika, hann var lánaður til Víkings um mitt sumar. Hann vildi ekki fara aftur til Víkings, hann sagði þá skulda sér laun. Það var síðan gert upp.
Castillion er uppalinn hjá Ajax og lék fjölda leikja fyrir yngri landslið Hollands á sínum tíma.
Framherjinn neitaði að fara í æfingaferð með FH í vetur og vildi komast burt, hann hefur ekki æft með liðinu síðustu vikur.
FH hefur reynt að losa Castillion á síðustu vikum og nú fær hann tækifæri til að finna taktinn, í Árbænum.