fbpx
Sunnudagur 26.maí 2019
433Sport

Ragnar Margeirsson var hvers manns hugljúfi: Tómarúm skapaðist eftir að ferlinum lauk – ,, Í lífsins ólgusjó gengur á ýmsu“

433
Fimmtudaginn 18. apríl 2019 10:15

Ekki missa af Helstu tíðindum dagsins í pósthólfið þitt

Lesa nánar

Tímavél:

Ragnar Ingi Margeirsson, er einn af betri knattspyrnumönnum sem Ísland hefur átt. Ragnar átti farsælan feril sem lauk árið 1996 en hann lést svo ungur að árum árið 2002, þá aðeins 39 ára gamall. Ragnar átti farsælan feril í efstu deild á Íslandi, hann lék með Keflavík, KR og Fram hér á landi, hvar sem Ragnar kom við þá skildi hann eftir sig gott orð, hann var afburðar knattspyrnumaður.

Ragnar var einn af þeim leikmönnum sem fjallað var um í þættinum, Goðsagnir efstu deildar á Stöð2 Sport. Það segir ýmislegt um það hversu öflugur knattspyrnumaður Ragnar var. ,,Það var erfitt að eiga við hann þegar hann var kominn með boltann í lappirnar,“ sagði Guðni Bergsson um Ragnar í þættinum sem kom út árið 2015.

Ferill Ragnars:
Knattspyrnuferill Ragnars hófst í Keflavík og ungur að árum sást að hæfileikar hans voru til staðar, Ragnar byrjaði um 17 ára aldurinn að spila með Keflavík og erlend lið voru fljót að taka eftir, árið 1980 þegar Ragnar var aðeins 18 ára gamall. Hélt hann fyrst í atvinnumennsku, hann samdi þá við FC Homburg í Þýskalandi.

Í Þýskalandi dvaldi Ragnar í eitt ár áður en hann gekk í raðir AA Gent, í Belgíu. Stopp Ragnars í Belgíu var stutt og hann snéri aftur heim til Keflavíkur, árið 1982. Stopp Ragnar á klakanum varði þó ekki lengi, erlend félög vissu af hæfileikum hans og sama ár samdi Ragnar við Cercle Brugge.

,,Hann var alltaf í fremstu röð á Íslandi, hann var sá leikmaður sem mér þótti best að spila með,“ sagði Gunnar Oddsson um Ragnar í Goðsögnum efstu deildar.

Dvöl Ragnar í Belgíu varð í eitt ár en alltaf kölluðu heimahagarnir á hann, Ragnar snéri aftur til Keflavíkur árið 1983 og stoppaði nú í tvö ár. Árið 1985 gekk Ragnar í raðir Thor Waterschei, í Belgíu. Hann hafði gefið af sér gott orð í Belgíu og félög þar höfðu alltaf mikinn áhuga á starfskröftum Ragnars, hann dvaldi hjá Thor Waterschei í tvö ár.

Það voru ekki allir Keflvíkingar sáttir með ákvörðun Ragnar árið 1987 að ganga þá í raðir Fram. Hann hafði alla tíð spilað með Keflavík á Íslandi. „Nei, ég á ekki von á því að mér verði illa tekið í Keflavík í kvöld. Það er ekkert hatur á milli mín og leik- manna Keflavíkurliðsins. Ég á von á því að þetta verði skemmtilegur leikur og það er víst að við fáum mikla mót- spyrnu í kvöld,“ sagði Ragnar árið 1987 þegar hann var að fara að mæta á sinn gamla heimavöll.

Ragnar dvaldi hjá Fram í eitt ár áður en hann samdi við 1860 Munchen þar sem hann lék með Guðna Bergssyni. Hann kom aftur heim til Íslands árið 1988 og þá gekk hann í raðir Keflavíkur. Árið 1989 lauk svo atvinnumannaferli Ragnars er hann lék með Sturm Graz í Austuríkki.

Ragnar kom heim árið 1990 og gekk í raðir KR, þar átti hann góða tíma til þriggja ára. Hann lauk svo ferli sínum sem knattspyrnumaður árð 1996 með Keflavík, í heimahögunum.

Farsæll landsliðsferill:
Ragnar lék 46 A-landsleiki á ferli sínum og skoraði í þeim fimm mörk, það er skemmtileg saga af Ragnar úr einni ferðinni sem Fótbolti.net sagði frá. ,,Ragnar Margeirsson fyrrum landsliðsmaður í knattspyrnu var eitt sinn staddur erlendis með íslenska landsliðinu fyrir nokkrum árum. Í einni fríhöfninni sá hann hið vinsæla spurningaspil Trivial Pursuit og þar sem spilið var nánast gefins skellti Raggi sér á það. Þegar hefja átti spurningaleikinn vandaðist málið þó heldur betur. Spurningarnar voru nefnilega allar á… búlgörsku.“

Ragnar Margeirsson lék fyrir öll landslið Íslands og skoraði fyrir þau öll.

Fallegar minningar:
Gunnar Oddsson sem lék lengi vel með Ragnari skrifaði fallega minningargrein um Ragnar eftir andlát hans árið 2002. ,,Ég á margar góðar minningar um þig, Raggi, sem ég mun geyma um ókomin ár. Í lífsins ólgusjó gengur á ýmsu, það er margt sem ber að varast og ekki er allt sem sýnist. Óhætt er að segja að fótboltinn hafi verið þinn heimavöllur, þar kunnir þú vel við þig, enda er mér til efs að jafnhæfileikaríkur piltur og þú varst eigi eftir að koma fram í boltanum. Þú þurftir að hætta í boltanum vegna meiðsla og við það myndaðist mikið tómarúm í þínu lífi. Baráttan við Bakkus varð þér erfið, þú gerðir tilraunir til að berjast við hann, en hann hafði alltaf betur. Eftir eina slíka baráttu sýndir þú mér hvaða mann þú hafðir að geyma, ég hafði misst bróður minn af slysförum og átti um sárt að binda. Þú hjálpaðir mér mikið þá, elsku vinur, en verst þykir mér að hafa aldrei sagt þér frá því.“

Guðni Bergsson hafði verið samherji Ragnar lengi og kvaddi góðan vin. ,,Raggi var einn af bestu knattspyrnumönnum landsins á þessum árum. Hann hafði ómælda hæfileika og var satt best að segja illviðráðanlegur þegar hann var í ham. Hann átti glæstan feril með landsliðinu, ÍBK, Fram, KR, Cerle Brugge og Waterschei í Belgíu. Fyrir mér á þessari stundu var Raggi þó fyrst og fremst góður og einstaklega hlýr félagi. Brosið var aldrei langt undan og það var ekkert smábros þegar best lét. Öllum líkaði vel við Ragga, það var ekki hægt annað. Við félagarnir í landsliðinu munum minnast þín af hlýhug,“ skrifaði Guðni á þessum erfiða tíma.

,,Ég vildi að ég hefði getað hjálpað þér og stutt þig í baráttunni sem þú háðir í seinni tíð, þú vonandi fyrirgefur það, Raggi minn. Nú er sorg í huga okkar allra en ég mun minnast þín sem frábærs knattspyrnumanns og góðs félaga.“

Hetjuleg barátta við sjúkdóminn:
Vignir Daðason ritaði um Ragnar, þann merka mann. ,,Raggi hafði átt við erfiðleika að stríða um nokkurt skeið sem að lokum leiddu til andláts hans.“

,,Kæri vinur, þú háðir hetjulega baráttu við sjúkdóm sem að lokum hafði betur. Ég veit að þangað sem þú ferð færðu hlýjar móttökur en ég mun geyma minningar um góðan dreng í hjarta mér og halda á loft nafni þínu sem góðs félaga og frábærs íþróttamanns.“

Haukur Ingi á frænda sínum mikið að þakka:
Haukur Ingi Guðnason var frændi Ragnars en þeir léku saman með Keflavík, þrátt fyrir að 16 ár væru á milli þeirra. ,,Það hafa fáir haft jafn mikil áhrif á mig sem knattspyrnumann og þú, Raggi minn. Ég var ungur þegar ég heyrði fyrst Margeir afa þinn stoltan segja hetjusögur af knattspyrnukappanum Ragga frænda. Mig langaði að feta í þín fótspor, ég vildi verða framherji líkt og þú. Einnig vildi ég alltaf leika í búningi númer 9 eins og þú, Raggi,“ skrifaði Haukur árið 2002.

,,Ég horfði stundum aðdáunaraugum á þig leika þér með Stebba í fótbolta á Háholtinu. Þó það hafi verið 16 ár á milli okkar þá dreymdi mig á þessum tíma um að fá að leika einhvern tímann við hlið þér á vellinum. Þessi gamli draumur varð að veruleika árið ’96 þegar við spiluðum saman með meistaraflokki Keflavíkur. Þetta ár er mér ógleymanlegt. Þú varst alltaf tilbúinn að leiðbeina og kenna mér. Ég lærði mikið af þér. Hjálpsemin uppmáluð, þannig varstu.“

,,Fyrir utan að vera knattspyrnulegum hæfileikum gæddur var Ragnar afburða ljúfur og góður maður. Kannski of góður, því hann lét stundum annarra vellíðan ganga fyrir sinni eigin.“

Minning Ragnars lifir og mun gera um ókomna tíð en vinir hans hafa haldið minningarmót, um Ragnar á hverju ári í Keflavík.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af

433Sport
Í gær

Pape kallar Björgvin fávita eftir rasísk ummæli hans: Unnsteinn og Logi Pedró tjá sig um málið

Pape kallar Björgvin fávita eftir rasísk ummæli hans: Unnsteinn og Logi Pedró tjá sig um málið
433Sport
Í gær

Barcelona sagt efast: Endar Griezmann í United?

Barcelona sagt efast: Endar Griezmann í United?
433Sport
Í gær

90 mínútur með Ögmundi Kristinssyni: Fundur með Moyes, deilur við þjálfara og vonbrigðin með HM

90 mínútur með Ögmundi Kristinssyni: Fundur með Moyes, deilur við þjálfara og vonbrigðin með HM
433Sport
Fyrir 2 dögum

Sjáðu reiðiskast stjörnu Chelsea: Reifst við leikmenn og þjálfara

Sjáðu reiðiskast stjörnu Chelsea: Reifst við leikmenn og þjálfara