Það kom ekki mörgum á óvart að Hannes Þór Halldórsson, hafi skrifað undir hjá Val í Pepsi deild karla í vikunni. Þetta var leyndarmál sem byrjaði að heyrast í janúar, nú hefur það verið opinberað.
Hannes er líklega stærsta nafnið sem komið hefur heim í Pepsi deildina, hann er besti markvörður Íslands og eitt stærsta nafnið í íslenska karlalandsliðinu sem hefur náð mögnuðum árangri.
Fyrir hafð Valur, Anton Ara Einarsson í marki sínu. Besta markvörð deildarinnar árið 2017 og einn allra besta markvörð landsins í dag.
Guðmundur Hilmarsson, blaðamaður á Morgunblaðinu heldur því fram að Anton hafi verið veikasti hlekkurinn í liði Vals í fyrra.
,,Markvarðarstaðan var líklega sú veikasta hjá Val í fyrra. Anton Ari Einarsson náði ekki að fylgja eftir góðu tímabili árið á undan og virkaði á köflum óöruggur. Það kom hins vegar ekki að sök því Valsliðið var það öflugt og tapaði aðeins tveimur af 22 leikjum sínum,“ skrfifaði Guðmundur í Morgunblaðið í dag.
,,Smiðurinn Óli Jó, sá gamli refur, er búinn að smíða enn sterkari hóp í ár og það verður erfitt fyrir önnur lið að standast meisturunum snúninginn. Valur er með sterkasta og breiðasta leikmannahópinn af liðunum 12 í deildinni og býr yfir þeim gæðum að skarta tveimur leikmönnum úr byrjunarliði landsliðsins.“