Hannes Þór Halldórsson hefur skrifað undir samning við Val. Þetta var gert á fréttamannafundi á Hlíðarenda í gær. Samningur Hannesar gildir til 2022, ljóst er að um mikinn hvalreka er að ræða fyrir Val.
Hannes verður 35 ára gamall síðar í þessum mánuði, markvörðurinn er sá besti sem Ísland á í dag.
Smelltu hér til að heyra ítarlegt viðtal okkar við Hannes
Hannes ræddi einnig félagaskipti sín í Fréttablaðinu í dag en þar fagnar hann því mikið að hafa losnað, frá Qarabag í Aserbaídsjan.
„Það er ofboðslegur léttir að hafa ákveðið það hvar ég kem til með að spila næstu árin. Tíminn í Aserbaídsjan var ekki eins og efni stóðu til og hann var erfiður og á köflum bara niðurlægjandi. Þegar ég er að taka ákvörðun um framtíð mína þá vil ég hafa puttana í því sjálfur. Það eru því fjölmargir fundir með aserskum umboðsmanni mínum og forráðamönnum að baki og það er þægileg tilfinning að vita að ég þarf ekki að díla við það meira. Ég gæti skrifað heila bók um tíma minn þarna ytra og geri það mögulega þegar tími gefst til,“ segir Hannes Þór í samtali við Fréttablaðið.
Fréttablaðið hafði sagt frá því fyrir um tveimur mánuðum að Hannes myndi ganga í raðir Vals. Það reyndist rétt en var ekki klárt á þeim tíma.
„Ég var með önnur tilboð hér og þar um heiminn á borðinu hjá mér og það var ekki alveg rétt sem Fréttablaðið staðhæfði að ég það væri klappað og klárt að ég myndi enda á Hlíðarenda.“