Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.
Rætt verður um fótbolta við áhugaverða gesti í vetur, farið verður um víðan völl.
Gestur þáttarins að þessu sinni er Garðar Gunnlaugsson sem ólst upp á Akranesi, gríðarleg pressa var á honum frá unga aldri enda bræður hans hetjur á Akranesi, Arnar og Bjarki.
Garðar sneri aftur heim úr atvinnumennsku árið 2012 er hann skrifaði undir samning við uppeldisfélagið ÍA.
Garðar hafði áður leikið fyrir CSKA Sofiu í Búlgaríu, LASK Linz í Austurríki og SpVgg Unterhaching í Þýskalandi.
Hann fékk boð um að halda áfram að spila erlendis en sonur hans kom fyrst og ákvað Garðar að halda heim.
,,Já það [meiðslin] og drengurinn minn sem er fæddur 2005, hann átti við málþroskaörðugleika að stríða,“ sagði Garðar.
,,Hann þurfti smá aðstoð til að ná tökum á því. Það hefði í rauninni ekki verið hægt í Þýskalandi því hann hafði ekki náð tökum á tungumálinu.“
,,Ef ég hefði farið að harka eitthvað eins og ég hefði getað gert þá hefði það örugglega þýtt annar flutningur á milli landa og svo framvegis.“
,,Ég ákvað að koma með hann heim, Ásdís og Viktoría dóttir mín urðu eftir í Búlgaríu. Mér bauðst að fara út eftir þetta, eftir að ég var kominn heim. Ég tók bara hann fram yfir það.“
,,Hann er á mjög góðum stað í dag. Hann er hörku duglegur og það er einmitt það sem hann fær, hann er nýkominn úr vitnisburði. Hann er það duglegur að hann þarf ekki að hafa áhyggjur í sínu lífi. Eins og lesskilningur eða eitthvað, hann er ennþá á eftir en hann vinnur í því á hverjum degi og ég er stoltur af honum.“