John Welsh, fyrrum leikmaður Liverpool á Englandi, var handtekinn á síðasta ári en the Liverpool Echo greinir frá í kvöld.
Welsh er 35 ára gamall í dag en hann er þekktastur fyrir tíma sinn hjá Preston frá 2012 til 2018 og var á meðal fyrirliði liðsins.
Hann er uppalinn hjá Liverpool og lék fjóra deildarleiki fyrir félagið frá 2001 til 2006 áður en hann samdi við Hull.
Welsh fór út á lífið í Liverpool með bræðrum sínum í mars á síðasta ári og réðst þar á eldri konu sem beið eftir leigubíl ásamt eiginmanni sínum.
Welsh er þriggja barna faðir en atvikið átti sér stað klukkan fjögur um nótt er hann var undir áhrifum áfengis.
,,Passaðu hvar þú labbar feita belja,” sagði Welsh við konuna sem starfar sem ökukennari. Hún ku ekki hafa ögrað Welsh á neinn hátt.
,,Ég má gera það sem ég vil andskotinn hafi það. Veistu ekki hver ég er?” bætti Welsh við áður en hann hótaði að finna út hvar hjónin ættu heima.
Eiginmaður konunnar blandaði sér svo í málið og brutust út slagsmál sem endaði með því að Welsh sparkaði í konuna sem féll til jarðar.
Hún hringdi í lögregluna um leið og var Welsh handtekinn á staðnum. Hann var dæmdur í 15 mánaða skilorðsbundið fangelsi í kjölfarið.