Mannréttindaskrifstofa Reykjavíkur hvetur KSÍ til að endurskoða ákvörðun sína um að veita Þórarni Inga Valdimarssyni aðeins bann í einn leik. Samkvæmt reglum KSÍ skuli veita að minnsta kosti fimm leikja bann fyrir brot af þessu tagi. Með ákvörðun sinni telur mannréttindaskrifstofan að KSÍ sé að styðja við óásættanlega hegðun og leggja blessun sína yfir fordóma.
Forsaga málsins er sú að um síðustu helgi á leik Leiknis og Stjörnunnar fékk Þórarinn Ingi Valdimarsson leikmaður Stjörnunnar rautt spjald fyrir ósæmileg ummæli í garð Ingólfs Sigurðssonar, leikmanns Leiknis, sem hann baðst í kjölfarið afsökunnar á. Ummælin beindust að andlegum veikindum sem Ingólfur hefur glímt við og tjáð sig um opinberlega.
Sjá einnig: Þórarinn hefur beðist afsökunnar og iðrast að mati Harðar
Eins og áður segir tók aganefnd KSÍ ákvörðun um að gefa Þórarni eins leiks bann vegna brotsins, en í reglum sambandsins segir að slíkt brot varði fimm leikja banni. Geðhjálp hefur meðal annarra gagnrýnt niðurstöðina og nú gerir Mannréttindaskrifstofa Reykjavíkurborgar hið sama.
Sjá einnig: Geðhjálp fordæmir niðurstöðu KSÍ
Í yfirlýsingu Mannréttindaskrifstofunnar segir:
,,Nú hefur Guðni Bergsson formaður KSÍ sagt í viðtali við fótbolta net að skýrsla dómara hafi ekki verið nægilega vel útfyllt og því hafi aganefndin ekki getað úrskurðar samkvæmt 16. greinni. Sé það raunin er ástæða til að biðja dómarann um að fylla samviskusamlega út skýrsluna og að aganefndin taki málið upp aftur. Verði það ekki gert þá er aganefndin og þar með KSÍ að leggja blessun sína yfir fordóma.
Mannréttindaskrifstofu ber, samkvæmt mannréttindastefnu borgarinnar, að standa vörð um að borgarbúum sé ekki mismunað m.a. vegna heilsufars. Skrifstofan tekur undir tilkynningu frá Leikni um málið þar sem segir m.a. að KSÍ sé með þessum úrskurði ekki að vinna gegn fordómum heldur styðji við óásættanlega hegðun.
Skrifstofan sendir Ingólfi hlýjar kveður og hvetur aganefnd KSÍ til að taka upp málið aftur.