Hörður Snævar Jónsson skrifar frá París:
,,Við erum að spila okkar besta leik til að vinna Ísland,“ sagði Didier Deschamps, þjálfari Frakklands. Ísland heimsækir, Heimsmeistarana í París á morgun. Um er að ræða leik í undankeppni EM, hart verður barist.
Ísland mætti Frakklandi í æfingaleik í október sem fór 2-2, sá leikur fór ekki fram á Stade de France. Síðast þegar Ísland heimsótti þjóðarleikvanginn, var á EM í Frakklandi.
Þar unnu heimamenn 5-2 sigur en íslenska liðið hafði slegið í gegn á EM 2016. ,,Það eru þrjú ár síðan, við lékum mjög vel í þeim leik.“
,,Ísland hafði komið mörgum á óvart fyrir leikinn gegn okkur, þeir eru sterkir í löngum innköstum og föstum leikatriðum. Það hefur komið mörgum liðum í vandræðu.“
,,Þeir eru með marga leikmenn sem voru á EM en það eru líka nokkrir farnir,“ sagði Deschamps sem hefur tekið eftir breytingu í leikstíl Íslands. Hann minntist á framherjana tvo sem Ísland hafði þá, Kolbein Sigþórsson og Jón Daða Böðvarsson. Hvorugur er með á morgun.
,,Þeir eru ekki eins mikið að sparka bara langt, þeir reyna að halda boltanum á jörðinni. Framherjarnir á EM voru erfiðir við að eiga en liðið spilar ekki sama leikstíl í dag.“