Hörður Snævar Jónsson skrifar frá Barcelona:
Íslenska karlalandsliðið vann sterkan sigur í undankeppni EM í gær er liðið mætti Andorra.
Leikur gærkvöldsins fór fram á heimavelli Andorra og höfðu strákarnir betur með tveimur mörkum gegn engu.
Um var að ræða fyrsta leik strákanna í undankeppninni og var gríðarlega mikilvægt að taka þrjú stig.
Ísland komst yfir í fyrri hálfleik með marki frá Birki Bjarnasyni en hann skoraði þá eftir hornspyrnu.
Staðan var 1-0 þar til í síðari hálfleik er Viðar Örn Kjartansson bætti við öðru marki en hann hafði komið inná sem varamaður. Lokastaðan 2-0 fyrir strákunum sem er gott veganesti fyrir leik gegn heimsmeisturum Frakklands eftir þrjá daga.
Íslenska liðið æfði í Andorra í morgun og síðan heldur liðið til Barcelona, þar mun mannskapurinn snæða saman áður en flugið er tekið til Parísar.
Liðið æfir á Stade de France í París á morgun og síðan er leikur við heimamenn á mánudagskvöld.
