Varnarmaðurinn Josh Yorwerth hefur verið dæmdur í fjögurra ára langt keppnisbann en þetta staðfesti enska knattspyrnusambandið í gær.
Yorwerth er 24 ára gamall Englendingur og var síðast á mála hjá Peterborough United í ensku þriðju deildinni.
Yorwerth skrópaði ítrekað í lyfjapróf á síðasta ári og er ástæðan einföld; hann er háður eiturlyfjum og áfengi.
Hann hefur viðurkennt það að hafa tekið inn kókaín og er nú í keppnisbanni þar til í október árið 2022.
,,Ég entist í þrjá daga án þess að sofa, án þess að borða. Ég drakk og tók eiturlyf,“ sagði Yerworth.
,,Hvað geri ég núna? Ég er ekki með neina menntun, ég hef aldrei stundað neitt annað á lífsleiðinni.“
Yorwerth er uppalinn hjá Cardiff City í ensku úrvalsdeildinni og á að baki sjö landsleiki fyrir welska U21 landsliðið.