Landssamtökin Geðhjálp hefur blandað sér í umræðuna vegna máls sem kom upp í leik Leiknis Reykjavík og Stjörnunnar á dögunum. Þórarinn Ingi Valdimarsson, leikmaður Stjörnunnar, lét þá ljót ummæli falla í garð Ingólfs Sigurðssonar, leikmanns Leiknis. Þórarinn hefur beðist afsökunar á þessum ummælum og hefur aganefnd KSÍ einnig farið yfir málið. Ákveðið var að Þórarinn myndi aðeins taka út eins leiks bann og verður ekki refsað frekar fyrir ummælin.
Geðhjálp birti pistil á Facebook-síðu sína í gær þar sem samtökin gagnrýna vinnubrögð KSÍ.
,,Geðhjálp veltir því fyrir sér hvers virði kjörorð KSÍ „Knattspyrna – leikur án fordóma“ sé þegar aganefnd sambandsins sér ekki ástæðu til að beita vægustu viðurlögum við fordómafullum ummælum gagnvart fólki með geðrænan vanda.“
,,Aganefndin ákvað að Þórarinn Ingi Valdimarsson, leikmaður Stjörnunnar, fengi aðeins hefðbundið eins leikja bann vegna rauðs spjalds fyrir fordómafull ummæli í garð Ingólfs Sigurðssonar, leikmanns Leiknis, þó 16. grein reglugerðar um aga- og úrskurðarmál veiti nefndinni býsna víðtækar heimildir til frekari viðurlaga.“
,,Meðal annars er sagt þar að „Hver sá sem misbýður öðrum einstaklingi eða hópi með fyrirlitningu, mismunun eða niðurlægingu í orði eða verki varðandi kynhneigð, kynferði, trúarbrögð, skoðanir, þjóðernisuppruna, kynþátt, litarhátt, og stöðu að öðru leyti skal sæta leikbanni í að minnsta kosti 5 leiki og banni frá viðkomandi leikvelli. Jafnframt skal félag viðkomandi sæta sekt að lágmarki að upphæð kr. 100.000.“