Hörður Snævar Jónsson skrifar frá Peralada á Spáni:
Íslenska landsliðið æfði í annað sinn í Katalóníu nú í morgun en leikmenn liðsins komu saman í gær. Undirbúningur fyrir undankeppni EM er í fullum gangi.
Liðið æfir í Peralada á Spáni í dag og á morgun og heldur síðan til Andorra snemma á fimmtudag, þar er leikur gegn heimamönnum á föstudag.
Allir leikmenn íslenska liðsins voru með á æfingu liðsins og sagði Freyr Alexandersson, aðstoðarlandsliðsþjálfari að langt væri síðan að íslenski hópurinn hefði verið í jafn góðu standi.
Eins og við sögðum frá í morgun er mikil og sterk lykt af hestaskít yfir vellinum þar sem landsliðið æfði og það mátti sjá á leikmönnum í dag að hún fór ekki vel í sumar.
,,Mér var óglatt á æfingu í gær,“ sagði Kári Árnason, miðvörður liðsins þegar upphitun átti sér stað í dag, margir leikmenn héldu fyrir nefið.
,,Djöfullsins skítalykt er þetta,“ sagði Aron Einar þegar hann ræddi við liðsfélaga sína en Rúrik Gíslason og fleiri voru duglegir að setja nefið undir peysuna, til að finna minni lykt.