Hörður Snævar Jónsson skrifar frá Peralada:
Íslenska landsliðið er komið til Spánar, undirbúningur fyrir fyrsta leikinnn í undankeppni EM er hafin. Liðið kom saman í dag og var fyrsta æfingin tekin síðdegis.
Margir af lykilmönnum liðsins voru hins vegar fjarverandi á æfingunni í dag, þannig voru Gylfi Þór Sigurðsson og Alfreð Finnbogason hvergi sjánlegir.
Sömu sögu er að segja af Jóhanni Berg Guðmundssyni en þeir félagar hafa líklega æft á hótelinu. Allir voru að spila um helgina og gæti það verið ástæðan.
Ari Freyr Skúlason var ekki heldur með og Björn Bergmann Sigurðarson var ekki á svæðinu.
Aron Einar Gunnarsson tók fullan þátt í æfingunni og virkar í fínu standi, meiðsli sem hafa hrjáð hann eru smátt og smátt að verða betri.
Það vakti athygli fyrir æfingu að landsliðið er komið með nýjan búnað, sá sér um að mæla allt hvað er í gangi hjá hverjum og einum leikmanni. Hver leikmaður fer í vesti sem sendir svo upplýsingar í tækið, þannig er hægt að fylgjast náið með formi leikmanna.
Flest stórlið nota svona búnað sem er dýr en getur borgað sig margfallt.