Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.
Rætt verður um fótbolta við áhugaverða gesti í vetur, farið verður um víðan völl.
Gestur þáttarins að þessu sinni er Erik Hamren sem hefur upplifað erfiða tíma í starfi sem landsliðsþjálfari karla, hann ræðir hér hörmungarnar sem hann gekk í gegnum í upphafi og framhaldið.
Undankeppni EM hefst á næsta föstudag þegar Ísland mætir Andorra og Frakklandi þremur dögum síðar.
Hamren ræddi sinn fyrsta leik sem landsliðsþjálfari Íslands en það var gegn Sviss í Þjóðadeildinni.
Ísland hefur sjaldan spilað eins illa og í þeim leik en strákarnir töpuðu sannfærandi með sex mörkum gegn engu.
Við spurðum Hamren að því hvort hann hafi einhvern tímann séð eftir því að hafa tekið við starfinu.
,,Fyrsta mínútan eftir leikinn gegn Sviss… Ég kom inn í búningsklefann og við höfðum tapað 6-0 í mínum fyrsta leik,“ sagði Hamren.
,,Ég hugsaði með mér: ‘what the fuck’. Þegar ég kom svo á hótelið og horfði á leikinn aftur þá finnurðu fyrir orku til að breyta þessu.“
,,Ég verð þó að viðurkenna það að þegar ég kom inn í klefann eftir tapið þá hugsaði ég með mér hvað væri í gangi.“