FIFA skoðar enn þann möguleika á að stækka HM 2022 í Katar í 48 lið en þessi hugmynd hefur verið á borðinu síðustu ár.

Katar er að undirbúa HM 2022 sem fram fer í nóvember og desember það árið. FIFA telur að tekjurnar af mótinu myndu aukast um 303 milljónir punda.

The Associated Press er með gögn frá fundi FIFA í Miami á föstudag þar sem þessar hugmyndir eru í vinnslu.

Til að þetta gangi upp þarf Katar að fá hjálp frá annari þjóð í kringum sig sem gæti verið með nokkra leiki. FIFA talar um að til að fjölga liðunum úr 32 í 48 þurfa 2-4 velli til viðbótar.

Katar er með 8 velli sem notaðir verða á HM en þeir eru á litlu svæði, mesta ferðalagið á milli valla eru litlir 55 kílómetrar.

FIFA nefnir að Barein, Kuwait, Oman, Saudi Arabía og Sameinuðu arabísku furstadæmin sem gætu hjálpað til. Eins og staðan er í dag er ekki möguleiki á því að Barein, Saudi Arabía eða Sameinuðu arabísku furstadæmin myndu gera það. Samband þeirra við Katar er ekki gott.