Guðmundur Hilmarsson, blaðamaður á Morgunblaðinu hefur áhyggjur af stöðu íslenska karlalandsliðsins í fótbolta.

Liðið vann ekki neinn alvöru landsleik á síðasta ári en undankeppni EM hefst í næsta mánuði. Þar keppir liðið við Andorra og Frakkland.

Ef allt er eðlilegt mun íslenska liðið fara með sigur af hólmi gegn Andorra en erfitt verkefni verður að sigra Frakkland á útivelli.

,,Íslenska landsliðið hrósaði síðast sigri í vináttuleik á móti Indónesíu um miðjan janúar í fyrra en hefur frá þeim leik spilað 15 leiki í röð án sigurs,“ skrifar Guðmundur í Morgunblaðið í dag.

,,Ísland hefur tapað níu þessara leikja, þar af sex mótsleikjum, og gert sex jafntefli. Frá því Svíinn Erik Hamrén tók við þjálfun landsliðsins af Heimi Hallgrímssyni hefur liðið spilað átta leiki, tapað fjórum og gert fjögur jafntefli. „

Guðmundur segir að Guðni Bergsson, formaður KSÍ, gæti þurft að reka Hamren ef Ísland vinnur ekki Andorra.

,,Ég geri kröfu á að Ísland vinni Andorra, sem er 94 sætum neðar en Ísland á styrkleikalista Alþjóðaknattspyrnusambandsins. Ef ekki þá held ég að Guðni Bergsson og kollegar hans í stjórn KSÍ þurfi að halda krísufund og ráða ráðum sínum um framtíð Svíans.“

Þá hefur Guðmundur áhyggjur af því hversu margir lykilmenn liðsins eru í meiðslum eða spila lítið.

,,En það sem veldur mér áhyggjum er staða margra landsliðsmanna. Sem dæmi er ljóst að Emil Hallfreðsson verður ekki í þessum leikjum vegna meiðsla, Alfreð Finnbogason er í kapphlaupi við tímann, Birkir Bjarnason er úti í kuldanum hjá Aston Villa og hefur ekki spilað í meira en mánuð, Rúnar Már Sigurjónsson hefur verið meiddur og ekkert spilað á árinu, Jón Daði Böðvarsson hefur verið mikið frá vegna meiðsla og Hannes Þór Halldórsson aðalmarkvörður landsliðsins og Kári Árnason hafa setið mikið á bekknum með liðum sínum“