Heimir Hallgrímsson, fyrrum landsliðsþjálfari Íslands, starfar í Katar í dag en hann þjálfar lið Al-Arabi.
Heimir og félagar mættu Al-Shahania á heimavelli í dag og vann liðið sinn fyrsta leik undir hans stjórn.
Al-Arabi hafði betur með tveimur mörkum gegn einu þar sem Wilfried Bony, fyrrum framherji Manchester City, komst á blað.
Þetta var fjórði leikur Heimis í deildinni en liðið hafði tapað tveimur og gert eitt jafntefli undir hans stjórn.
Al-Arabi situr í sjötta sæti deildarinnar með 24 stig eftir 17 umferðir og er 17 stigum frá toppliði Al-Sadd.
