Hlynur Bæringsson og Jónar Arnór Stefánsson munu báðir í kvöld leika sinn síðasta leik fyrir körfuboltalandsliðið. Tveir af þeim bestu í sögu körfuboltans á Íslandi kveðja.
Víðir Sigurðsson, skrifar skemmtilegan bakvörð í Morgunblað dagsins en þar er hann að tala um að það sé ekki sjálfsagður hlutur að kveðja afburða íþróttafólk.
Þannig hafa tveir bestu knattspyrnumenn í sögu Íslands spilað sinn síðasta leik án þess að nokkur vissi af.
,,Tækifærin til að kveðja afburða íþróttafólk eru ekki alltaf til staðar. Ásgeir Sigurvinsson, fremsti knattspyrnumaður Íslandssögunnar að margra mati, vildi af sinni alkunnu hógværð ekki lýsa því yfir fyrir leik Íslands og Tyrklands á Laugardalsvelli haustið 1989 að það yrði kveðjuleikur sinn,“ skrifar Víðir í bakverði sínum.
Ásgeir hefur alla tíð verið lítið fyrir athygli. ,,Sjálfur kvaddi Ásgeir hins vegar landsliðið í þeim leik á sinn hátt, með eftirminnilegri frammistöðu og einum af bestu leikjum sínum í landsliðstreyjunni, í 2:1 sigri á Tyrkjum.“
Eiður Smári Guðjohnsen lék sinn síðasta landsleik á EM í Frakklandi árið 2016 en kallað var eftir því að hann myndi fá kveðjuleik á Laugardalsvelli. Aldrei varð að honum.
,,Eiður Smári Guðjohnsen lauk landsliðsferli sínum á EM í Frakklandi, með leik í 8 liða úrslitum, en ekki gafst tækifæri til að hylla hann sérstaklega í kveðjuleik. Þeir sem á annað borð hafa áhuga á körfubolta hljóta að nýta sér einstakt tækifæri með því að bregða sér í Höllina í kvöld og kveðja þá Jón Arnór og Hlyn.“