Tómas Ingi Tómasson yfirþjálfari yngri flokka Fylkis og fyrrum aðstoðarþjálfari 21 árs landsliðs Íslands hefur ekki náð bata frá því að hann fékk gervimjöðm í ársbyrjun 2015.
Tómas var afburða knattspyrnumaður sem spilaði með ÍBV, KR, Grindavík og Þrótti hér heima við góðan orðstýr en það tók sinn toll líkamlega og aðgerðin var óumflýjanleg.
Árið 2018 hafði verið einstaklega erfitt líkamlega og andlega fyrir hann og fjölskyldu hans, þar sem Tómas var meira en 200 daga á spítala.
Nú sér hann hins vegar ljós við enda ganganna eftir að hafa gengist undir aðgerð í Þýskalandi en hann hefur undanfarið, verið bundinn við hjólastól.
„Miðað við allt sem er búið að skera frá í fyrri aðgerðum þá held ég að þetta hafi tekist mjög vel,“ sagði Tómas Ingi í viðtali við Arnar Björnsson á Stöð2.
Tómas hefur farið í fjölda aðgerða til að reyna að laga þetta en ekki er endalaust hægt að opna líkamann.
„Það er ekki endalaust hægt að opna menn og reyna upp á nýtt þannig að þetta var eiginlega síðasta stoppistöð. Maður var hræddur fyrir aðgerðina en ég vissi að ég væri í höndum bestu lækna í heimi.“
Hann segir mikinn mun á því að fara til Þýskalands í aðgerðina, það sé gæðamunur.
„Það er eins og að fara úr minni deild í Meistaradeildina að koma hingað og ég er ótrúlega glaður að ég sjái möguleika á því að ganga aftur. Að ég sé ekki bundinn hjólastól eða á hækjum eða bundinn öðru hjálpartæki.“
Fjölskylda og vinir Tómasar hafa staðið mjög þétt við bak hans en það fór meðal annars fram styrktarleikur.
„Númer eitt, tvö og þrjú er fjölskyldan sem hefur staðið þétt við bakið á mér en svo á ég ofboðslega góða vini. Það að gamlir fótboltafélagar og fullt af fólki sem maður hefur snert í lífinu komi svona sterkt inn í þetta ferli hjá mér hefur verið hvatning fyrir mig. Ég er ævinlega þakklátur því fólki.“