Það kom upp fáránlegt atvik á Ítalíu í dag er lið Pro Piacenza mættiu Cuneo í ítölsku C-deildinni.
Pro Piacenza er á botninum í þriðju deildinni og er með aðeins átta stig eftir að hafa spilað 19 leiki.
Önnur lið hafa spilað í kringum 24 til 27 leiki en Pro Piacenza mætti ekki til leiks í þremur viðureignum í röð fyrir leik dagsins.
Átta stig hafa verið tekin af liðinu og er augljóst að fall verði niðurstaðan er deildinni lýkur í sumar.
Það eru mikil fjárhagsvandræði í gangi hjá Pro Piacenza og hafa engir leikmenn fengið borguð laun.
Liðið þurfti að mæta til leiks í dag en annars hefði félaginu verið sparkað úr deildinni fyrir að sleppa of mörgum leikjum.
Það var erfitt að finna menn til að taka þátt í leiknum en aðeins sjö leikmenn voru á leikskýrslu gegn 23 hjá Cuneo.
Greint er frá því að félagið hafi ekki borgað neinum starfsmönnum né leikmönnum laun síðan í ágúst.
Það varð til þess að nánast allir leikmennirnir riftu samningi sínum en leikmennirnir sem spiluðu í dag voru á aldrinum 16 til 19 ára gamlir.
Blaðið Sport Piacenza sá um að lýsa leiknum í beinni í dag en hætti lýsingunni í hálfleik er staðan var 16-0 fyrir Cuneo.
Leikurinn endaði svo 20-0 fyrir gestunum og er Pro Piacenza nú með markatöluna 18:56 á botni deildarinnar.