Það muna margir eftir undrabarninu fyrrverandi Ravel Morrison sem lék með Manchester United.
Morrison var talinn gríðarlegt efni á sínum tíma en þótti oft vera til vandræða utan vallar og hefur ferillinn ekki náð þeim hæðum sem búist var við.
Morrison samdi á dögunum við lið Ostersunds í Svíþjóð eftir nokkur ár hjá ítalska félaginu Lazio.
Hann hefur verið ásakaður um að stela, um að vera metnaðarlaus og fleira en telur sig vera fórnarlamb.
,,Þetta var alltaf: ‘Ravel gerði þetta, Ravel gerði hitt,’ sagði Morrison í samtali við the Times.
,,Það eina sem ég tók voru fótboltaskór sem leikmaðurinn notaði ekki lengur. Úr? Símar? Það var fáránlegt.“
,,Það voru tímar þar sem ég gerði eitthvað vitlaust en yfirleitt var það bara rangur tími á röngum stað með röngu fólki. Þetta var ekki ég að gera eitthvað.“
,,Ég fer ekki út á lífið til að hella mig fullan eða búa til vandræði. Ég keyri ekki fullur, ég reyki ekki og tek ekki eiturlyf. Aðrir leikmenn komast upp með það.“
,,Getið þið ímyndað ykkur hvað hefði gerst ef ég hefði keyrt undir áhrifum? Ef ég geri eitthvað þá er sá stimpill á mér að eilífu.“
,,Ég gerði mistök þegar ég var ungur en það eru tíu ár síðan. Allir gera mistök þegar þeir eru yngri.“