Guðmundur Hilmarsson blaðamaður á Morgunblaðinu er með skemmtilegan Bakvörð í blaði dagsins. Þar skrifa blaðamenn Morgunblaðsins skoðun sína.

Guðmundur er harður stuðningsmaður Manchester United og hann virðist elska lífið undir stjórn Ole Gunnar Solskjær hjá félaginu.

Solskjær hefur unnið tíu af ellefu leikjum sínum sem stjóri United en hann fær stórt próf í kvöld gegn PSG í 16 liða úrslitum Meistaradeildarinnar.

,,Það hafa heldur betur orðið umskipti hjá Manchester United eftir að Ole Gunnar Solskjær tók við stjórastöðunni hjá félaginu af José Mourinho seint í desembermánuði. Ég sem dyggur stuðningsmaður Manchester United frá unga aldri var nánast hættur að fylgjast með leikjum liðsins undir það síðasta í tíð Mourinho og ég óskaði mér einskis heitara en að hann yrði rekinn,“ skrifar Guðmundur í Morgunblaðið

,,Mér varð loks að ósk minni. Skemmdarverk Mourinho á liði United voru loks stöðvuð. Portúgalska
hrokagikknum var sparkað og norska markavélin á árum áður, Ole Gunnar Solskjær, var fenginn til að stýra liðinu út leiktíðina.“

,,Morðinginn með barnsandlitið“ var gælunafn Solskjærs þegar hann hrellti varnir og markverði andstæðinganna miskunnarlaust og á undanförnum vikum hafa mótherjar United fengið að kenna á snilli Norðmannsins í stjórastólnum. Nú er aftur orðið gaman að fylgjast með „rauðu djöflunum“ sínum. Leikur liðsins hefur tekið þvílíkum stakkaskiptum undir stjórn Solskjærs og nánast hver einasti leikmaður liðsins hefur sprungið út.“

Að mati Guðmunduar á Solskjær að verða stjóri United til framtíðar.

,,Sú spennitreyja sem þeir voru í hjá Mourinho hefur verið losuð og úrslitin, markaskor og gleðin innan hópsins segir allt sem segja þarf. Ég trúi ekki öðru en að Solskjær sé búinn að tryggja sér stjórastólinn hjá Manchester United til frambúðar. Honum hefur tekist að rífa liðið úr öskustónni og koma því upp í fjórða sæti í ensku úrvalsdeildinni sem var í órafjarlægð þegar hann var ráðinn í starfið.“

,,Solskjærs og lærisveina hans bíða nú þrír risaleikir. Í kvöld taka þeir á móti Paris SG í Meistaradeildinni, heimsæja Chelsea í bikarnum á mánudaginn og fá svo erkifjendurna í Liverpool í heimsókn annan sunnudag. Ég geri mér grein fyrir því að Solskjær fer ekki taplaus í gegnum tímabilið en þessum leikjum má hann alls ekki tap.“