Leicester City er að undirbúa nýtt samningstilboð fyrir Brendan Rodgers, stjóra félagsins.

Frá þessu greina enskir miðlar í dag en Leicester óttast að Arsenal reyni að stela stjóranum.

Arsenal er að leita sér að stjóra þessa stundina en Unai Emery var rekinn frá félaginu í síðustu viku.

Rodgers hefur náð frábærum árangri með Leicester en hann tók við liðinu í fyrra eftir dvöl hjá Celtic.

Hann er samningsbundinn Leicester til ársins 2022 en félagið ætlar að bjóða honum fimm milljóna punda launahækkun.

Leicester situr í öðru sæti úrvalsdeildarinnar en liðið hefur unnið 11 af fyrstu 15 deildarleikjunum.