Nicky Butt, yfirmaður akademíu Manchester United, hefur nefnt mestu vonbrigði félagsins síðan hann tók að sér það starf.
Butt er einnig fyrrum leikmaður United en hann er 44 ára gamall í dag og sér um unglinga félagsins.
Butt segir að Adnan Januzaj séu mestu vonbrigðin sem hann hefur orðið vitni af til þessa.
Januzaj er 24 ára gamall leikmaður Real Sociedad í dag en hann var gríðarlegt efni hjá United á sínum tíma.
,,Að mínu mati, mestu vonbrigðin hjá félaginu voru Adnan Januzaj,“ sagði Butt við ESPN.
,,Ég held að ég hafi ekki séð eins góðan leikmann síðan Ryan Giggs. Hann var ótrúlegur.“
,,Hann hefði átt að verða stórstjarna. Hann er enn að spila atvinnumennsku og mun eiga góðan feril.“
,,Ég er viss um að hann sé milljónamæringur og mun ekki hafa áhyggjur af reikningunum en hann hefði átt að verða ofurstjarna.“
